मुंबई (Mumbai): मुंबई रेल्वे विकास कॉर्पोरेशनने (एमआरव्हीसी) मुंबईच्या उपनगरीय रेल्वेच्या आधुनिकीकरणासाठी महत्त्वाचे पाऊल उचलले आहे. पूर्ण वातानुकूलित असणाऱ्या २,८५६ उपनगरीय वंदे मेट्रो डब्यांच्या खरेदी व दीर्घकालीन देखभालीसाठी एमआरव्हीसीने टेंडर प्रसिद्ध केले आहे.
हे रॅक १२, १५ व १८ डब्यांच्या रचनेत उपलब्ध करून देण्यात येणार आहेत. यामुळे प्रवासी क्षमता आणि सुरक्षिततेत वाढ होणार आहे. सध्या मुंबईतील बहुतेक उपनगरीय गाड्या १२ डब्यांच्या चालवल्या जातात, तर काही सेवा १५ डब्यांच्या सुरू आहेत. भविष्यातील लोकलची वाढणारी मागणी पूर्ण करण्यासाठी व गर्दी कमी करण्यासाठी एमआरव्हीसीने या खरेदीत मोठ्या प्रमाणावर १५ डब्यांच्या सेवांचा तसेच आवश्यकतेनुसार १८ डब्यांच्या गाड्यांचा समावेश केला आहे.
मुंबई नागरी परिवहन प्रकल्प टप्पा-३ व ३अ अंतर्गत हे टेंडर काढण्यात आले आहे. टेंडर क्रिया पूर्ण झाल्यानंतर कंपनीकडून पुढील दोन वर्षांनंतर हे डबे रेल्वेला मिळणार आहेत. आधुनिक वंदे मेट्रो डबे पुरवण्याबरोबरच पुढील ३५ वर्षांपर्यंत त्यांच्या देखभालीचेही टेंडर काढण्यात आले आहे.
मध्य रेल्वेवरील भिवपुरी येथे व पश्चिम रेल्वेवरील वाणगांव येथे अत्याधुनिक मेंटेनन्स डेपो विकसित केले जातील. यासाठी ८ डिसेंबर २०२५ पासून सुरू टेंडर प्रक्रिया सुरू होईल, तर २२ डिसेंबर रोजी टेंडर उघडण्यात येतील. हे टेंडर मेक इन इंडिया धोरणानुसार राबवले जाणार आहे. त्यामुळे देशांतर्गत उत्पादन व तंत्रज्ञानाचा यामध्ये मोठ्या प्रमाणात समावेश होईल.
उपनगरीय मार्गासाठी २,८५६ वंदे मेट्रोच्या डब्यांची ही महत्त्वाकांक्षी खरेदी मुंबईच्या वाहतूक पायाभूत सुविधांमध्ये एक मोठा बदल घडवून आणेल. १२, १५ व १८ डब्यांचे अधिक लांब, जलद व सुरक्षित रॅक सुरू करून आम्ही गर्दी कमी करणे तसेच वेळेवर सेवा व प्रवासी सुरक्षा सुनिश्चित करणार आहोत. स्वयंचलित दरवाजे, प्रगत तांत्रिक वैशिष्ट्ये व जागतिक दर्जाची देखभाल सहाय्य यांसारख्या आधुनिक सुविधांसह एमआरव्हीसी लाखो दैनंदिन प्रवाशांच्या अपेक्षा पूर्ण करणारी भविष्याभिमुख उपनगरीय रेल्वे देण्यासाठी कटिबद्ध आहे.
- विलास सोपान वाडेकर, अध्यक्ष व व्यवस्थापकीय संचालक, एमआरव्हीसी
उपनगरीय वंदे मेट्रो डब्यांची प्रमुख वैशिष्ट्ये
वातानुकूलित, पूर्णपणे वेस्टिब्यूल्ड रॅक
जास्त त्वरण व ब्रेकिंग क्षमता, वेळेवर धावण्यासाठी उपयुक्त
सुरक्षेसाठी स्वयंचलित दरवाजे बंद प्रणाली
आधुनिक आतील सजावट, गादीदार आसन, मोबाईल चार्जिंग पॉइंट व माहितीप्रद प्रणाली
१३० कि.मी. प्रति तासापर्यंत वेग क्षमता
दोन्ही टोकांना विक्रेत्यांसाठी डबे (स्वतंत्र एसी डक्टसह)
उच्च क्षमतेचे एचव्हीएसी - मुंबईच्या हवामानातील प्रवाशांच्या आरामाची खात्री करणे
जागतिक दर्जाच्या सुरक्षा प्रणाली, ज्यामध्ये सुधारित ब्रेकिंग आणि प्रवासी प्रवाह डिझाइनचा समावेश आहे.