Mumbai: बलाढ्य अदानी समूहाला मागे टाकले; मोनोरेलच्या संचलनाची धुरा 'त्या' कंपनीकडे

मुंबई (Mumbai): वारंवार होणारे अपघात आणि तांत्रिक बिघाडांमुळे सध्या ठप्प असलेल्या मुंबई मोनोरेलला पुन्हा रुळावर आणण्यासाठी प्रशासनाने मोठी पावले उचलली आहेत. चेंबूर ते जेकब सर्कल या मार्गिकेच्या संचलन आणि देखभालीसाठी आता खासगी कंत्राटदाराची नियुक्ती निश्चित झाली असून, अदानी समूहाला मागे टाकत 'पाॅवर मेक प्रोजेक्टस'ने हे महत्त्वाचे कंत्राट पटकावले आहे.

मुंबईची ओळख बनू पाहणारी पण गेल्या काही काळापासून सातत्याने वादाच्या भोवऱ्यात अडकलेली चेंबूर ते जेकब सर्कल मोनोरेल आता एका नव्या पर्वात प्रवेश करण्यास सज्ज झाली आहे. महा मुंबई मेट्रो संचलन महामंडळाने (एमएमएमओसीएल) या मार्गिकेच्या दैनंदिन संचलन आणि देखभालीसाठी खासगी कंत्राटदार नेमण्याची प्रक्रिया पूर्ण केली असून, त्यात पाॅवर मेक प्रोजेक्टस लिमिटेड या कंपनीने बाजी मारली आहे.

विशेष म्हणजे या शर्यतीत अदानी इन्फ्रास्ट्रक्चर मॅनेजमेंट सर्व्हिसेस लिमिटेड सारख्या मोठ्या कंपनीचाही समावेश होता, मात्र कमी खर्चाची निविदा सादर केल्यामुळे पाॅवर मेककडे हे काम सोपवले जाणार असल्याचे आता स्पष्ट झाले आहे.

एमएमएमओसीएलने या कामासाठी २९७ कोटी रुपयांची निविदा अपेक्षित धरली होती. या स्पर्धेत अदानी समूहाने ३०८.४ कोटी रुपयांची बोली लावली होती, तर पाॅवर मेक प्रोजेक्टसने त्यापेक्षा कमी म्हणजेच २९६.४ कोटी रुपयांची निविदा सादर करून मोहोर उमटवली.

याआधी कोकण रेल्वे आणि इंडवेल कन्स्ट्रक्शन या कंपन्यांनीही तांत्रिक निविदा सादर केल्या होत्या, मात्र अंतिम टप्प्यात दोनच कंपन्यांमध्ये आर्थिक चुरस पाहायला मिळाली. १ जानेवारी रोजी आर्थिक निविदा खुल्या झाल्यानंतर आता केवळ अधिकृत घोषणेची औपचारिकता उरली आहे.

मोनोरेलचा इतिहास पाहता, २०१४ मध्ये ही सेवा सुरू झाल्यापासून तिला अनेक अडथळ्यांचा सामना करावा लागला आहे. सुरुवातीला २०१८ पर्यंत एल अँड टी-स्कोमी कन्सोर्टियमकडे याच्या देखभालीची जबाबदारी होती. मात्र, कामातील अनियमितता आणि सुरक्षेच्या प्रश्नांमुळे प्रशासनाने हे कंत्राट रद्द करून कारभार स्वतःकडे घेतला होता.

तेव्हापासून एमएमएमओसीएल ही जबाबदारी सांभाळत होती. परंतु, जुनी होत चाललेली यंत्रणा आणि वारंवार होणारे अपघात यामुळे प्रवाशांच्या सुरक्षेचा प्रश्न ऐरणीवर आला होता. याच पार्श्वभूमीवर गेल्या सप्टेंबर महिन्यापासून मोनोरेलची सेवा अनिश्चित काळासाठी बंद ठेवण्याचा धाडसी निर्णय एमएमआरडीएने घेतला.

सध्या ही मार्गिका बंद असली तरी, त्यामागे या संपूर्ण प्रणालीचे अत्याधुनिकीकरण करण्याचा उद्देश असल्याचे सांगितले जात आहे. यंत्रणेत सुधारणा करणे आणि तांत्रिक त्रुटी दूर करून ही सेवा अधिक सुरक्षित आणि वेगवान बनवण्यासाठी प्रशासनाचे प्रयत्न सुरू आहेत.

मात्र, कंत्राटदाराची नियुक्ती होऊनही ही सेवा प्रत्यक्षात कधी सुरू होणार, याबाबत अद्याप कोणतेही अधिकृत स्पष्टीकरण एमएमआरडीए किंवा एमएमएमओसीएलकडून देण्यात आलेले नाही. त्यामुळे प्रवाशांमध्ये संभ्रमाचे वातावरण असून, नव्या कंत्राटदाराच्या आगमनानंतर मोनोरेलचे 'रुळ' पुन्हा कधी धावणार, याकडे मुंबईकरांचे लक्ष लागले आहे.