मुंबई (Mumbai) : मेट्रोने प्रवास करणाऱ्या मुंबईकरांसाठी मेट्रो प्रशासनाने एक चांगली बातमी दिली आहे. मेट्रोचा प्रवास आता 'डिजिटल' होणार असून, त्यामुळे प्रवाशांना चांगली सुविधा मिळू शकणार आहे. (Mumbai Metro Aqua Line Digital Payment News)
मुंबई मेट्रो रेल कॉर्पोरेशनने (MMRC) नॅशनल पेमेंट्स कॉर्पोरेशन ऑफ इंडिया (NPCI) आणि स्टेट बँक ऑफ इंडिया (SBI) यांच्या सहकार्याने मुंबई मेट्रो मार्ग ३ वर (Metro 3) रुपे एनसीएमसी NCMC कार्ड तयार केले असून, या कार्डचे अनावरण मुख्यमंत्री देवेंद्र फडणवीस (Devendra Fadnavis) यांच्या हस्ते पार पडले.
या नवीन सुविधेमुळे आता प्रवासी आरे जे.व्ही.एल.आर. ते आचार्य अत्रे चौक दरम्यान एनसीएमसी NCMC कार्ड वापरून सहज व संपर्करहित प्रवास करू शकतील. यामुळे तिकीट खिडकीवर रांगा टाळता येतील आणि प्रवास अधिक जलद व सुरक्षित होईल.
हे एनसीएमसी NCMC कार्ड मेट्रो मार्ग ३ सोबतच मार्ग २अ , ७ आणि मार्ग १ वर देखील वापरता येईल, त्यामुळे एकसंध व सोयीस्कर प्रवासाचा अनुभव मिळेल. इतर मेट्रो मार्ग व 'चलो बस' सारख्या ट्रान्सपोर्ट ऑपरेटर्सने उपलब्ध करून दिलेले एनसीएमसी NCMC कार्ड्स देखील मेट्रो मार्ग ३ वर वापरता येतील. प्रवाशांना ११ जून २०२५ पासून सकाळी ११ वाजल्यापासून ही सेवा उपलब्ध होईल.
नवीन एनसीएमसी NCMC कार्ड आरे जे व्ही एल आर ते आचार्य अत्रे चौक दरम्यान कोणत्याही स्थानकावर उपलब्ध आहे व SBI च्या सहभागी शाखांमधुन कार्ड मिळेल. हे कार्ड मोफत दिले जात आहे, मात्र वापरासाठी ₹१०० ते ₹२००० पर्यंत अनिवार्य टॉप-अप करणे आवश्यक आहे.
“एनसीएमसी NCMC कार्ड हे इतर वाहतूक सुविधा जसे की बेस्ट बसेस तसेच विविध मेट्रो मार्गाच्या एकत्रीकरणाच्या दृष्टीने व सावर्जनिक वाहतूक व्यवस्था अधिक बळकट करण्याचा दृष्टीने एक महत्त्वाचा टप्पा आहे. NPCI व SBI यांच्या सहकार्याने आम्ही मुंबईकरांसाठी एक सुलभ आणि एकत्रित प्रवासाचा अनुभव देण्यासाठी कटिबद्ध आहोत,” असे मुंबई मेट्रो रेल कॉर्पोरेशनच्या व्यवस्थापकीय संचालिका अश्विनी भिडे यांनी सांगितले.
यावेळी राज्याचे उपमुख्यमंत्री एकनाथ शिंदे, उपमुख्यमंत्री अजित पवार. महसूल मंत्री, चंद्रशेखर बावनकुळे; मुख्य सचिव सुजाता सौनिक आदी उपस्थित होते.