मुंबई (Mumbai) : राज्य सरकारने सिडकोला छत्रपती शिवाजी महाराज आंतरराष्ट्रीय विमानतळ आणि नवी मुंबई आंतरराष्ट्रीय विमानतळ जोडणाऱ्या मेट्रो 8 च्या अंमलबजावणीस मंजुरी दिली आहे. या प्रकल्पाचा सविस्तर प्रकल्प अहवाल पूर्ण झाला असून, तो सार्वजनिक-खासगी भागीदारी तत्त्वावर राबवला जाणार आहे.
तसेच, मेट्रो 2, 3 आणि 4 एकत्रित करून आता एकच कॉरिडॉर तयार करण्यात येत आहे, ज्याला मेट्रो मार्गिका 2 असे नाव देण्यात आले आहे. हा मार्ग पेंधर ते नवी मुंबई आंतरराष्ट्रीय विमानतळच्या पूर्व बाजूस 16 किलोमीटर लांबीचा असेल.
या मार्गाचा डीपीआर सध्या तयार होत आहे. तसेच, नवी मुंबई विमानतळ प्रभाव क्षेत्र (NAINA) मधील भविष्यातील वाहतूक गरजा पूर्ण करण्यासाठी दोन नवीन मेट्रो मार्गिकांच्या डीपीआरची प्रक्रिया सिडकोने सुरू केली आहे.
मेट्रो 8 ही 35 किलोमीटर लांबीची असेल, यापैकी 9.25 किलोमीटर भुयारी आणि 25.63 किलोमीटर उन्नत असेल. हा मार्ग छत्रपती शिवाजी महाराज आंतरराष्ट्रीय विमानतळ टर्मिनल 2 पासून सुरू होईल, छेडानगरपर्यंत भुयारी असेल आणि त्यानंतर नवी मुंबई आंतरराष्ट्रीय विमानतळापर्यंत उन्नत मार्ग असेल. हा मार्ग कुर्ला, लोकमान्य टिळक टर्मिनस, मानखुर्द, वाशी, नेरूळ आणि बेलापूर या महत्त्वाच्या ठिकाणांमधून जाईल.
या कॉरिडॉरमुळे दोन्ही विमानतळांमधील जोडणी सुधारेल, रस्त्यावरील वाहतूक कोंडी कमी होईल, कनेक्टिंग फ्लाइट्ससाठी प्रवास वेळ कमी होईल आणि वाढत्या देशांतर्गत व आंतरराष्ट्रीय प्रवासी संख्येला सामावून घेता येईल.
नवी मुंबई मेट्रोचा पहिला टप्पा, मार्गिका 1, नोव्हेंबर 2023 मध्ये सुरू झाला. ही 11.1 किलोमीटरची मेट्रो सीबीडी बेलापूर ते पेंधर जोडते. महा मेट्रोद्वारे संचालित, ही मार्गिका सीबीडी बेलापूर, खारघर, तळोजा आणि आसपासच्या भागातील रहिवाशांसाठी उपयुक्त ठरली आहे. सिडको आता या मार्गिकेचा 3.02 किलोमीटरने (मार्गिका-1A) बेलापूर ते नवी मुंबई आंतरराष्ट्रीय विमानतळापर्यंत विस्तार करणार आहे, ही मेट्रो 8 शी जोडली जाईल.
सिडकोने मेट्रो 1 साठी अत्याधुनिक ऑपरेशन्स कंट्रोल सेंटर (OCC) स्थापन केले आहे. हे केंद्र रिअल-टाईम ट्रेन हालचालींचे व्यवस्थापन करते, याशिवाय, सिडकोने मेट्रो ट्रेन ड्रायव्हिंग सिम्युलेटर बसवले आहे, ही ट्रेनची गती आणि सुरक्षेशी संबंधित संगणक-आधारित प्रशिक्षण यंत्रणा आहे.
कार्यक्षमता वाढवण्यासाठी, सिडकोने मूळ नियोजित मेट्रो मार्गिका 2, 3 आणि 4 एकत्र करून एकच मेट्रो मार्गिका 2 तयार केली आहे. पेंधर ते नवी मुंबई आंतरराष्ट्रीय विमानतळ (पूर्व) पर्यंतचा हा 16 किलोमीटरचा कॉरिडॉर पीएमएवाय गृहनिर्माण क्लस्टर, तळोजा एमआयडीसी आणि इतर वसाहतींना जोडेल.
या कॉरिडॉरमुळे प्रवासी संख्या वाढेल आणि दैनंदिन प्रवासी आणि औद्योगिक क्षेत्रातील कामगारांसाठी कनेक्टिव्हिटी देईल, या एकात्मिक मार्गिकेचा डीपीआर सध्या तयार होत आहे, असेही सांगण्यात आले.
नैना क्षेत्राचे वाढते महत्त्व ओळखून, सिडकोने या क्षेत्रासाठी दोन स्वतंत्र मेट्रो मार्गिकांचे डीपीआर सुरू केले आहेत. या मार्गिका विमानतळ प्रभाव क्षेत्रातील नियोजित औद्योगिक, निवासी आणि संस्थात्मक विकासांसाठी वाहतूक सुविधा उपलब्ध करून देतील.
यासंदर्भात सिडकोचे उपाध्यक्ष आणि व्यवस्थापकीय संचालक विजय सिंगल यांनी सांगितले, नवी मुंबई मेट्रो प्रकल्प हा आमच्या शाश्वत शहरी विकासाच्या दृष्टिकोनाचा केंद्रबिंदू आहे. मार्गिका 1 ला प्रवाशांचा उत्कृष्ट प्रतिसाद मिळाला असून, मार्गिका 2 आणि मार्गिका 8 च्या भविष्यातील विस्तारामुळे विमानतळ जोडणी आणि प्रवास सुविधा मोठ्या प्रमाणात सुधारतील.