पुणे (Pune) : पुणे महापालिकेच्या (PMC) प्रमुख पाच दवाखान्यांमधील आरोग्य सुविधा सुधाराव्यात, डॉक्टर, नर्स उपलब्ध व्हावेत, पुरेशा खाटा मिळण्यासाठी योजना तयार करण्यात आली. त्यासाठी सुमारे चार कोटी रुपये खर्च केला जाणार होता.
कमला नेहरू रुग्णालयात काही सुधारणा करण्यात आल्या. पण आठ महिन्यांपूर्वी आरोग्य विभागात अधिकाऱ्यांच्या अंतर्गत बदल्या झाल्या अन् ही योजनाच बंद पडली. याबाबत नवीन अधिकाऱ्यांना कोणतीही माहिती नसल्याचा धक्कादायक प्रकार समोर आला आहे. त्यामुळे ही रुग्णालय सुधारची योजनाच कोमात गेली आहे.
पुणे महापालिकेतर्फे आरोग्य सेवेवर दरवर्षी कोट्यवधी रुपये खर्च केले जात असले तरी रुग्णसेवेबाबत अनेक तक्रारी आहेत. मोफत उपचार असले तरी असुविधांमुळे रुग्ण व नातेवाईक या रुग्णालयांकडे पाठ फिरवतात. तसेच स्वच्छतेकडेही दुर्लक्ष केले जाते.
तत्कालीन महापालिका आयुक्त विक्रम कुमार यांनी आरोग्य विभागाच्या अधिकाऱ्यांना मंगळवार पेठेतील कमला नेहरू रूग्णालय, भवानी पेठेतील सोनवणे रूग्णालय आणि येरवड्यातील राजीव गांधी रुग्णालय, सिंहगड रस्त्यावरील लायगुडे रुग्णालय, शिवाजीनगर येथील दळवी रुग्णालय, हडपसर येथील मगर रुग्णालयात सुधारणा करण्यासाठी आराखडा तयार करण्याचा आदेश दिला होते.
पहिल्या टप्प्यात काय होते?
पहिल्या टप्प्यात कमला नेहरू, सोनवणे रुग्णालय आणि राजीव गांधी रुग्णालयाचा आराखडा तयार केला. त्यात तज्ज्ञ डॉक्टर, पुरेसे मनुष्यबळ, अत्याधुनिक उपचारांसह चांगली सुविधा देण्याचे नियोजन केले आहे. तसेच या तिन्ही रुग्णालयांत खाटांची संख्या १६० ने वाढणार होती. या योजनेचे काम डिसेंबर २०२३ मध्ये पूर्ण करण्यात येईल, असे सांगण्यात आले.
पण पदभरतीसाठी बिंदूनामावली तयार करणे, पदभरती करणे, वैद्यकीय उपकरणे खरेदी करणे, जागा निश्‍चित करणे या कारणांमुळे उशीर झाल्याचे सांगण्यात आले. कमला नेहरू रुग्णालय हे वैद्यकीय महाविद्यालयासाठी वापरले जात असल्याने तेथे काही डॉक्टर नियुक्त झाले, वैद्यकीय उपकरणे खरेदी केले. पण उर्वरित रुग्णालयांसाठी काहीच केले नसल्याचे दिसत आहे.
संवादाचा अभाव
रुग्णालय सुधारची जबाबदारी सहाय्यक आरोग्य प्रमुख डॉ. संजीव वावरे यांच्याकडे होती. तेव्हा कमला नेहरू रुग्णालयात सुधारणा करण्याचे काम सुरु होते. याबाबत ते म्हणाले, ‘‘आठ महिन्यांपासून या कामाची जबाबदारी माझ्याकडे नसून ती आता सहाय्यक आरोग्य प्रमुख डॉ. कल्पना बळिवंत यांच्याकडे आहे.’’
याबाबत डॉ. बळिवंत यांना विचारले असता त्या म्हणाल्या, ‘‘अशी कोणतीही योजना सुरु असल्याची मला माहिती नाही. कर्मचाऱ्यांनाही याबाबत काही सांगितले नाही. याची माहिती घेतली जाईल.’’ अधिकाऱ्यांच्या जबाबदाऱ्या बदलत असताना त्यांच्यात संवादच झाला नसल्याचे यावरून समोर आले आहे.
आरोग्यसेवा वाऱ्यावर
पुण्यात गुलियन बॅरी सिंड्रोमचे (जीबीएस) रुग्ण आढळून येत आहेत. त्यांच्यावर उपचारासाठी महापालिकेच्या रुग्णालयात यंत्रणा अपुरी आहे. बहुतांश ठिकाणी रुग्णालयाच्या इमारती अन्य संस्थांना भाड्याने दिल्या जात असल्याने तेथे पैसे देऊन सेवा घ्याव्या लागत आहेत. पॅथलॅबसाठी ज्या संस्थांना काम दिले, त्या ठरलेल्या दरापेक्षा जास्त पैसे उकळत असल्याचे समोर आहे. त्यामुळे महापालिकेचे रुग्णालय अद्ययावत झाले नाहीतच, पण आरोग्य सेवाही वाऱ्यावर असल्याचे स्पष्ट झाले आहे.
हे होणे होते अपेक्षित
१) रेडिओलॉजिस्ट, सर्जन, बालरोगतज्ज्ञ, भूलतज्ज्ञांसह इतर रोगांवरील शस्त्रक्रिया करणाऱ्या डॉक्टरांची नियुक्ती
२) वैद्यकीय अधिकारी, परिचारिकांना प्रशिक्षण
३) अत्याधुनिक उपकरणे व तज्ज्ञ डॉक्टरांमुळे चांगले उपचार
असे होते मनुष्यबळ व खाटांचे नियोजन
कमला नेहरू रुग्णालय
- खाटांची संख्या- २८०
- प्रस्तावित खाटा- ३८० (१०० ने वाढ)
- सध्याचे कर्मचारी- ३२५
- प्रस्तावित कर्मचारी- ४२५ (१००ने वाढ)
राजीव गांधी रुग्णालय
- सध्याच्या खाटा- ६०
- प्रस्तावित खाटा- ९५ (३५ ने वाढ)
- सध्याचे कर्मचारी- ७०
- प्रस्तावित कर्मचारी- ९० (२० ने वाढ)
सोनवणे रुग्णालय
- सध्याच्या खाटा- ७५
- प्रस्तावित खाटा- १०० (२५ ने वाढ)
- सध्याचे कर्मचारी- ५०
- प्रस्तावित कर्मचारी- ७५ (२५ ने वाढ)