Pune : हिंजवडीतील वाहतूक कोंडी सोडविण्यासाठी 'हा' सहापदरी एलिव्हेटेड कॉरिडॉर होणार

पुणे (Pune) : हिंजवडी आयटी पंचक्रोशीत वाहतुकीची समस्या दिवसेंदिवस अधिक जटील होत असताना त्यावर पर्याय म्हणून देहूरोड-कात्रज बाह्यवळण मार्गावर रावेत ते नऱ्हे पर्यंत २४ किलोमीटरचा सहा पदरी एलिव्हेटेड कॉरिडॉर प्रकल्प साकारण्यात येणार आहे. सुमारे दोन हजार कोटी रुपयांचा खर्च त्याला अपेक्षित असून त्याबरोबरीने सहाशे कोटी रुपये खर्चून सेवा रस्ते विकसित केले जाणार आहेत. परंतु, लोकसभा निवडणुकीपूर्वी तत्कालीन केंद्रीय मंत्रिमंडळाने मंजुरी देऊन सात महिने उलटले तरी प्रत्यक्षात या प्रकल्पाचा मुहूर्त अद्याप साधला गेलेला नाही. हा प्रकल्प केवळ कागदावरच राहिला आहे.

आयटी पार्क हिंजवडीसह लगतच्या गावांची जीवघेण्या वाहतूक कोंडीतून मुक्तता करण्यासाठी नाशिक फाटा ते खेड या आठ पदरी एलिव्हेटेड मार्गाच्या धर्तीवर मुंबई-बंगळूर महामार्गावरील (देहूरोड-कात्रज बाह्यवळण मार्ग) तसेच आयटी पार्क हिंजवडीजवळून तसेच वाकड, ताथवडे, पुनावळे, रावेत, बालेवाडी, बाणेर, सुस, बावधन आदी गावांतून जाणारा रावेत - नऱ्हे या सहा पदरी व २४ किमी अंतराचा एलिव्हेटेड प्रकल्प प्रस्तावित आहे.

जलद कृतीची गरज

रावेत ते बालेवाडी या सुमारे आठ किलोमीटर अंतराच्या या पहिल्या टप्प्यातील एलिव्हेट मार्गासाठी जलद कृती होण्याची आवश्यकता आहे. युद्ध पातळीवर सर्व निविदा प्रक्रिया राबवून हा प्रकल्प प्रत्यक्षात सुरु होणे आयटी पार्क हिंजवडीसह लगतच्या सर्व भागांसाठी अत्यंत गरजेचे आहे. कारण, हिंजवडी आयटीसह माण, मारुंजी, नेरे, जांबे, कासारसाई, ताथवडे, पुनावळे वाकड, किवळे या भागातील वाहतूक समस्या अतिशय जटील बनली आहे.

प्रमुख समस्या...

- किवळेपासून वाकडपर्यंतच्या सेवा रस्त्यांचे काम रखडले

- प्रमुख रस्त्यांसह सर्व सेवा रस्त्यांची पावसात अतिशय वाईट अवस्था

- सेवा रस्त्यावर खड्डेच खड्डे, तास न तास वाहतूक कोंडीचा सामना

- मोठ्या खड्ड्यांमधून वाट काढताना मोठी दमछाक, अनेकांना व्याधींना ग्रासले

- भूमकर चौक, ताथवडे, पुनावळे भुयारी मार्गाची रुंदी व उंची कमी

आराखड्याच्या मंजुरीची प्रतीक्षा

राष्ट्रीय महामार्ग प्राधिकरण (एनएचआय) कडून पिंपरी-चिंचवड, पुणे व ग्रामीण हद्दीतील महामार्गा लगतच्या सेवा रस्ता रुंदीकरणाच्या कामाला मंजुरी मिळाली असून पहिल्या टप्प्यात रावेत ते वाकडपर्यंतच्या सेवा रस्त्याच्या रुंदीकरण व डांबरीकरणासाठी पिंपरी-चिंचवड महापालिका भूसंपादन प्रक्रिया राबविणार असून वाकडपासून खेड शिवापूरपर्यंत दोन्ही बाजूंच्या सेवा रस्त्यांचे काँक्रिटीकरण करण्यात येणार आहे. या कामांसाठी सहाशे कोटींचा खर्च अपेक्षित आहे. तर; दोन हजार कोटी रुपयांच्या एलिव्हेटेड कॉरिडॉर प्रारूप आराखड्याला मंजुरी मिळताच रावेत ते बालेवाडी, बालेवाडी ते वारजे अन वारजे ते नऱ्हे अशा तीन टप्प्यात हा २४ किलोमीटरचा प्रकल्प साकारला जाणार आहे.

भुयारी मार्ग कोंडीचे ‘हॉट स्पॉट’

बाह्यवळण मार्गावर मामुर्डी, विकास नगर, किवळे, रावेत, पुनावळे, ताथवडे, भुमकर चौक व भुजबळ चौक येथे भुयारी मार्ग आहेत. त्यातील किवळे आणि भुजबळ चौकाजवळील दोन्ही भुयारी मार्ग पुरेशा उंचीचे आहेत. मात्र, ताथवडे, पुनावळे येथील भुयारी मार्ग कमी उंचीचे आहेत. तर; भुमकर चौक, ताथवडे, पुनावळे भुयारी मार्गात थोडा पाऊस पडताच तळे साचून वाहनांच्या रांगा लागतात. पुनावळे, ताथवडे भुयारी मार्ग तुलनेने उंची आणि रुंदीने अतिशय लहान असल्याने दररोज होणाऱ्या येथील कोंडीला सर्वजण पुरते वैतागले आहेत.

भुजबळ चौक, भुमकर चौक, पुनावळे, ताथवडे चौक येथील वाहतूक कोंडी नित्याचीच झालेली आहे. नियोजित एलिव्हेटेड कॉरिडॉर प्रकल्पामुळे ही कोंडी सुटण्यास मदत होणार आहे. मात्र, प्रकल्प मंजूर झाल्याचे अनेक महिन्यांपासून आमच्या ऐकिवात आहे. प्रत्यक्षात कुठलीही कृती झाली नाही. त्यामुळे हा प्रकल्प लवकरात लवकर सुरू करावा. जेणेकरून या भागातील वाहतूक कोंडीला पूर्णविराम मिळेल.

- राजेंद्र करपे, रहिवासी, वाकड

हिंजवडीत प्रवास करणे म्हणजे मोठ्या अग्निदिव्यातून गेल्यासारखे आहे. दहा मिनिटांच्या अंतरासाठी कोंडीत तास न तास अडकावे लागते. वाहतूक समस्या गेल्या अनेक वर्षांपासून गंभीर बनलेली असताना प्रकल्प मंजूर असूनही प्रशासन कोणाची वाट बघत आहे, असा प्रश्न पडत आहे. एलिव्हेटेड कॉरिडॉर येथील जीवघेणा वाहतूक कोंडीवर रामबाण उपाय ठरू शकतो.

- दत्तात्रेय देशमुख, आयटीयन्स

एलिव्हेटेड कॉरिडॉरचा विकास आराखडा आम्ही केंद्रीय रस्ते मंत्रालयाकडे सुपूर्त केला आहे. तो विस्तृत प्रकल्प अहवाल (डीपीआर) अर्थ मंत्रालयाच्या समितीकडे तपासणीसाठी आहे. त्यानंतर तो प्लॅन डिपार्टमेंट ऑफ एक्सपेंडेचर विभागाकडे मंजुरीसाठी येईल. तिथून मंजूर होताच पुढील प्रक्रिया राबवून प्रत्यक्षात कामाला सुरुवात होईल.

- अंकित यादव, व्यवस्थापक, तांत्रिक विभाग, एनएचआय