जांबुटके एमआयडीसीचा ‘श्रीगणेशा’; ५९.७३ कोटींत पायाभूत सुविधा उभारणार

नाशिक (Nashik) : दिंडोरी तालुक्यातील जांबुटके येथे प्रस्तावित औद्योगिक क्षेत्राच्या विकासाला आता गती मिळण्याची शक्यता आहे. महाराष्ट्र औद्योगिक विकास महामंडळाने (एमआयडीसी) जांबुटके औद्योगिक क्षेत्रातील विविध पायाभूत सुविधा उभारण्यासाठी ५९ कोटी ७३ लाख ८६ हजार रुपयांचे टेंडर प्रसिद्ध केले आहे. सुमारे २९.५२ हेक्टर क्षेत्रावर विकसित होणाऱ्या या औद्योगिक क्षेत्रात भूखंडांसोबतच पाणी, वीज, अंतर्गत रस्ते, स्ट्रीट लाइट, तयार औद्योगिक शेड आणि सामुदायिक सुविधाही उपलब्ध करून दिल्या जाणार आहेत.

दिंडोरी तालुक्यातील जांबुटके येथे राज्यातील पहिले आदिवासी औद्योगिक क्लस्टर उभारण्याची घोषणा तत्कालीन उपमुख्यमंत्री स्व. अजित पवार यांनी २०२२-२३ च्या अर्थसंकल्पात केली होती. तत्कालीन विधानसभा उपाध्यक्ष नरहरी झिरवाळ यांच्या पाठपुराव्यानंतर या प्रकल्पासाठी अर्थसंकल्पात २५ कोटी रुपयांची तरतूद करण्यात आली होती. सरकारने १ डिसेंबर २०२२ रोजी यासंदर्भात अधिसूचना प्रसिद्ध केली.

मधल्या काळात प्रकल्पाबाबत फारशी हालचाल झाली नाही. त्यानंतर १७ जून २०२५ रोजी मंत्रिमंडळाने जमीन एमआयडीसीकडे हस्तांतरित करण्यास औपचारिक मंजुरी दिली. पुढे २ एप्रिल २०२६ रोजी महसूल व वन विभागाने शासन निर्णयाद्वारे २९.५२ हेक्टर जमीन एमआयडीसीकडे हस्तांतरित करण्यास मान्यता दिली. त्यानंतर औद्योगिक वसाहतीसाठी पायाभूत सुविधा उभारण्याचे टेंडर प्रसिद्ध करण्यात आले आहे.

जांबुटके औद्योगिक क्षेत्र राष्ट्रीय महामार्ग ८४८ लगत विकसित करण्यात येणार आहे. या क्षेत्रासाठी वाघाड धरणातून सुमारे १० किलोमीटर जलवाहिनी टाकण्यात येणार असून, धरणातून पाणी उचलण्यासाठी जॅकवेल आणि पंपिंग यंत्रणा उभारली जाईल. औद्योगिक क्षेत्रात दररोज १.५० दशलक्ष लिटर (१.५० एमएलडी) क्षमतेचा जलशुद्धीकरण प्रकल्प उभारण्यात येणार आहे. तसेच ३०० घनमीटर क्षमतेचा उंच जलकुंभ आणि १,००० घनमीटर क्षमतेचा आरसीसी जलसाठा (Sump) बांधण्यात येणार आहे.

वाघाड धरणातील कच्चे पाणी जॅकवेलद्वारे उचलून जलशुद्धीकरण प्रकल्पात आणले जाईल. यासाठी अत्याधुनिक पंपिंग मशिनरी व संबंधित यंत्रणा बसवण्यात येणार आहे. जॅकवेलपर्यंत जाण्यासाठी ३.७५ मीटर रुंदीचा अ‍ॅप्रोच रोड आणि ५ मीटर रुंदीचा आरसीसी पूलही उभारण्यात येणार आहे.

५८ ‘प्लग-अँड-प्ले’ शेडची सुविधा

जांबुटके औद्योगिक क्षेत्राचे प्रमुख वैशिष्ट्य म्हणजे ५८ ‘प्लग-अँड-प्ले’ शेड. प्री-इंजिनिअर्ड बिल्डिंग (PEB) पद्धतीने या शेडची उभारणी केली जाणार आहे. भूखंडाच्या आकारानुसार शेडचे आकारमान वेगवेगळे असेल. प्रत्येक शेडला अंतर्गत रस्ता, प्रारंभिक डांबरीकरण, कंपाउंड वॉल आणि प्रवेशद्वाराची सुविधा असेल. त्यामुळे उद्योजकांना सुरुवातीच्या टप्प्यात मोठ्या बांधकामाची गरज कमी होऊन व्यवसाय सुरू करण्यासाठी जागा लवकर उपलब्ध होण्याची अपेक्षा आहे.

कन्व्हेन्शन सेंटरसह स्वतंत्र प्रवेशद्वार

औद्योगिक क्षेत्रात सुमारे २,००० चौरस मीटर बांधकाम क्षेत्राचे कन्व्हेन्शन सेंटर उभारण्यात येणार आहे. औद्योगिक क्षेत्रातील सामूहिक कार्यक्रम, बैठका, प्रशिक्षण आणि व्यावसायिक उपक्रमांसाठी त्याचा वापर होणार आहे. याशिवाय ट्रायबल इंडस्ट्रियल क्लस्टरसाठी स्वतंत्र प्रवेशद्वार उभारण्यात येणार आहे.

उद्योगांसाठी स्वतंत्र वीज जाळे

उद्योगांना वीजपुरवठा देण्यासाठी ११ केव्ही एचटी आणि एलटी वीज वितरण जाळे उभारण्यात येणार आहे. यामध्ये २०० केव्हीए डीटीसी, ११ केव्ही एक्स्प्रेस फीडर आणि संबंधित यंत्रणेचा समावेश आहे. आवश्यकतेनुसार विद्यमान ३३ केव्ही, ११ केव्ही आणि एलटी वीजवाहिन्यांचे स्थलांतरही केले जाणार आहे.

या पायाभूत सुविधांमुळे जांबुटके औद्योगिक क्षेत्रात जमीन, पाणी, वीज, अंतर्गत रस्ते, प्रकाशव्यवस्था आणि तयार औद्योगिक शेड यांचा एकत्रित विकास होणार आहे. त्यामुळे दिंडोरी तालुक्यातील औद्योगिक विकासाला चालना मिळण्याबरोबरच स्थानिक पातळीवर रोजगारनिर्मितीला हातभार लागण्याची अपेक्षा आहे.

Key Points

• जांबुटके औद्योगिक क्षेत्रातील पायाभूत सुविधांसाठी ५९.७३ कोटी रुपयांचे टेंडर,

• २९.५२ हेक्टर क्षेत्रावर औद्योगिक क्षेत्राचा विकास,

• वाघाड धरणातून सुमारे १० किलोमीटर जलवाहिनी आणि १.५० एमएलडी जलशुद्धीकरण प्रकल्प,

• उद्योजकांसाठी ५८ ‘प्लग-अँड-प्ले’ शेड आणि २,००० चौ.मी. कन्व्हेन्शन सेंटर,

• ११ केव्ही एचटी-एलटी वीज जाळे, अंतर्गत रस्ते आणि इतर पायाभूत सुविधांची उभारणी.