पुणे (Pune) : पुणे-ठाणे (Pune-Thane) मार्गावर सध्या दिवसभरातून सात ई-शिवनेरी धावत आहेत. प्रवाशांचा त्याला चांगला प्रतिसाद लाभत आहे. मुंबईतदेखील चार्जिंग स्टेशनचे काम वेगाने सुरू आहे. ते काम काही दिवसांत पूर्ण होईल. त्यानंतर मे महिन्याच्या अखेरीस पुणे-मुंबई मार्गावर किमान ५० ई-शिवनेरी धावणार आहेत. त्यामुळे प्रवाशांची चांगली सोय होणार आहे.
मुख्यमंत्री एकनाथ शिंदे यांच्या हस्ते ठाणे-पुणे ई-शिवनेरी बसचे उद्‌घाटन झाले. त्यानंतर दोन दिवसांतच बसची संख्या वाढविण्यात आली. बुधवारी ७ बस या मार्गावर सोडण्यात आल्या. सर्वच बसना प्रवाशांचा चांगला प्रतिसाद मिळत आहे. बस कंपनीकडून ज्या प्रमाणात बस उपलब्ध होतील, तशा त्या लागलीच प्रवाशांच्या सेवेत रुजू केल्या जाणार आहे.
तोट्यात धावणारी शिवनेरी आता नफ्यात
पुणे-मुंबई मार्गावर डिझेलवर धावणाऱ्या शिवनेरीचा वाहतुकीचा खर्च अधिक होता. त्यामुळे या मार्गावरच्या शिवनेरीचा उत्पन्न कमी अन् खर्च अधिक अशी स्थिती होती. आता मात्र ई-शिवनेरीमुळे परिस्थिती बदलली आहे. यामुळे वाहतुकीचा खर्च तुलनेने कमी आहे. त्यामुळे काही दिवस आधी तोट्यात धावणारी ई-शिवनेरी आता पाच ते सहा प्रति किलोमीटर नफ्यात आली आहे.
‘कॅपिटल कॉस्ट’मुळे तिकीट दर जैसे थे
ई-शिवनेरीच्या वाहतुकीचा खर्च कमी झाला असला तरीही कंपनीच्या बस खरेदीच्या कॅपिटल कॉस्टचा विचार करता या मार्गावर धावणारी डिझेलवरील ई-शिवनेरी बंद होणार नाही. तोपर्यंत ई-शिवनेरीचे तिकीट दर कमी होण्याची शक्यता नाही. आता डिझेल व ई-शिवनेरीचे प्रति प्रवासी तिकीट ५१५ रुपये आहे.
बस कंपनीकडून जशा बस उपलब्ध होतील, तशा त्या मार्गावर सोडण्यात येतील. मे अखेरीस ५० ई-शिवनेरी पुणे-मुंबई मार्गावर धावतील. एकूण १०० बसचे नियोजन आम्ही केले आहे.
- शिवाजी जगताप, सरव्यवस्थापक (वाहतूक), राज्य परिवहन महामंडळ, मुंबई
