Pune : पुण्यातील 'तो' प्रश्नही अखेर मार्गी लागला; काम अंतिम टप्प्यात

PMCTendernama

पुणे (Pune) : जैववैद्यकीय कचऱ्यावर योग्य प्रक्रिया करण्यासाठी पुणे महापालिका (PMC) आणि पास्को एन्व्हायर्न्मेंटल सोल्यूशनतर्फे पुणे रेल्वे स्थानक परिसरात साकारलेल्या कचरा विघटन प्रकल्पाचे काम अंतिम टप्प्यात आले आहे. या प्रकल्पात सध्या काही प्रमाणात जैववैद्यकीय कचऱ्याच्या विघटनाचे काम सुरू असून, २६ लाख किलोग्रॅमहून अधिक जैववैद्यकीय कचऱ्याचे विघटन करण्यात आले. त्यामुळे भविष्यात जैववैद्यकीय कचरा प्रक्रियेची समस्या कमी होणार आहे.

तगादा : रेल्वे प्रशासनाच्या जाणीवपूर्वक दुर्लक्षामुळे 'हे' स्टेशन आहे काळोखात

कोरोना काळात पुण्यात जैववैद्यकीय कचऱ्यावर प्रक्रिया करण्यासाठी पुरेशी यंत्रणा उपलब्ध नव्हती. हे लक्षात घेत जैववैद्यकीय कचऱ्यावर पुण्यातच विघटन प्रक्रिया करता यावी, म्हणून हा प्रकल्प निर्माण केला आहे. या प्रकल्पाचे काम ९० टक्के पूर्ण झाले असून उर्वरित १० टक्के काम बाकी आहे. ते होताच प्रकल्प पूर्ण क्षमतेने सुरू होईल. प्रायोगिक तत्त्वावर विघटन प्रक्रियेचे काम होत असून, मशिनची कार्यक्षमताही चांगली आहे, असे ‘पास्को’ कंपनीचे संचालक सुनील दंडवते यांनी सांगितले.

२६ लाखांहून अधिक किलो कचरा संकलन

पुण्यात या वर्षी जानेवारी ते २० नोव्हेंबरपर्यंत सुमारे २६ लाख ५० हजार किलोग्रॅम कचऱ्याचे संकलन केले गेले. यामध्ये मुदतबाह्य औषधे, प्रयोगशाळेतील टाकाऊ कचरा, रुग्णालयांद्वारे टाकण्यात येणारे वैद्यकीय साहित्य व उपकरणे यांचा समावेश आहे. संकलित कचऱ्यातील सुमारे १३ लाख ३६ हजार किलोग्रॅम कचऱ्यावर इन्सिनेरेशन, तर सुमारे १३ लाख १३ हजार किलोग्रॅम कचऱ्यावर ऑटोक्लेव्हच्या माध्यमातून प्रक्रिया करण्यात आली.