मुंबई (Mumbai) : डी.बी.एस. रियल्टी कंपनीला चांदिवली येथे पुनर्वसन प्रकल्पाअंतर्गत 4000 सदनिका बांधकामाचे दिलेले 1584 कोटींचे टेंडर मुंबई महापालिकेने रद्द केले आहे.
झोपडपट्टी पुनर्वसन प्राधिकरणाच्या प्रकल्पासाठी राखीव जमिनीवरच या सदनिका बांधण्याचे टेंडर मुंबई महानगरपालिकेने 4 मार्च 2022 रोजी या कंपनीला दिले होते. भाजप नेते डॉ. किरीट सोमैया यांनी हा घोटाळा उघडकीस आणून गेला महिनाभर मुख्यमंत्री कार्यालय तसेच मुंबई महानगरपालिका, झोपडपट्टी पुनर्वसन प्राधिकरण व अन्य अधिकाऱ्यांकडे पाठपुरावा केला होता. नुकतीच यासंदर्भात आझाद मैदान पोलिस स्टेशन येथे सोमैया यांनी तक्रारही दाखल केली.
मुंबई महापालिकेने नगरविकास विभाग, झोपडपट्टी पुनर्वसन प्राधिकरण यांची ना हरकत प्रमाणपत्र (NOC) न घेता फसवणूक केली. या प्रकल्पाचे बांधकाम डी.बी.एस. रियल्टी ही कंपनी करणार होती. टेंडर देऊन 15 महिने उलटले तरी पुढे काहीच झालेले नाही. शिंदे-फडणवीस सरकार आल्यानंतर झोपडपट्टी पुनर्वसन प्राधिकरणाने संबंधित जमीन देण्यास नकार दिला. दरम्यान, मुंबई महानगरपालिका आयुक्त इक्बालसिंह चहल यांनी हे टेंडर रद्द केले आहे. याप्रकरणी मुंबई महापालिका आयुक्त व सुधार समितीचे तत्कालीन अधिकारी जबाबदार असून त्यांच्या विरोधात गुन्हा दाखल करण्यात यावा अशी मागणी डॉ. किरीट सोमैया यांनी केली आहे.
