Nashik : नाशिक जिल्ह्यासाठी Good News! 'या' प्रकल्पाच्या जागेसाठी 108 कोटी जमा
नाशिक (Nashik) : केंद्र सरकारच्या सरकारच्या 'सागरमाला' उपक्रमांतर्गत निफाड तालुक्यात निफाड सहकारी साखर कारखान्याच्या जागेत ड्राय पोर्ट तथा मल्टी मॉडेल हब विकसित करण्याचा निर्णय घेतला असून या प्रकल्पासाठी ११६.५ एकर जागेपोटी जवाहरलाल नेहरू बंदर प्राधिकरणने निफाड प्रांताधिकारी कार्यालयाच्या बँक खात्यात १०८ कोटी रुपये जमा केले आहेत. यामुळे लवकरच या जागेच्या भूसंपादनाची प्रक्रिया पूर्ण होणार आहे.
दरम्यान यापूर्वी जागेची मोजणी करण्यास गेलेल्या कर्मचारी, अधिकारी यांना निफाड कारखान्याच्या कामगारांनी विरोध केला होता. यामुळे महसूल विभागाला तत्पुर्वी कामगारांसोबत चर्चा करून तोडगा काढावा लागणार आहे.
केंद्र सरकारने निफाड तालुक्यात निफाड सहकारी साखर कारखान्याच्या जागेत येथे ड्राय पोर्ट तथा मल्टी मॉडेल हबसाठी ५०० कोटींची गुंतवणूक करण्याचा निर्णय घेतला आहे. या ड्रायपोर्टची उभारणी करण्याची जबाबदारी जवाहरलाल नेहरू पोर्टट्रस्ट (जेएनपीटी) यांच्यावर आहे. यामुळे मागील जुलैमध्ये जेएनपीटीने ड्रायपोर्ट उभारण्यासाठी निफाड सहकारी साखार कारखान्याची १०८ एकर जमीन व खासगी ८.५ एकर जमीन अशी ११६.५ एकर जमीन खरेदी करण्याचे निर्देश नाशिक जिल्हाधिकाऱ्यांना दिले आहेत. या जमीन खरेदीसाठी जवाहरलाल नेहरू बंदर प्राधिकरणने १०८ कोटी १५ लाख ७५ हजार ५०८ रुपये निफाड प्रांताधिकारी कार्यालयाच्या बँक खात्यात जमा केले आहेत.
सुरवातीला २०१४ मध्ये निफाड तालुक्यात ड्रायपोर्ट उभारण्याची घोषणा तत्कालीन केंद्रीय रस्ते वाहतूक व बंदरे विकास मंत्री नितीन गडकरी यांनी केली होती. त्यानंतर ड्रायपोर्टबाबत केंद्र सरकारच्या धोरणात बदल झाल्यामुळे निफाड येथे ड्रायपोर्ट उभारता येणार नसल्याचे स्पष्ट झाले. मात्र, त्यातही आरोग्य राज्यमंत्री डॉ. भारती पवार यांनी मार्ग काढण्याचा प्रयत्न केला. त्यात जवाहरलाल नेहरू बंदर प्राधिकरणाने कंटेनर डेपोबाबत धोरणात्मक बदल करून नाशिकच्या ड्रायपोर्टच्या जागेवर मल्टीमॉडेल हब उभारण्याची तयारी दर्शवली.
त्यानुसार जवाहरलाल नेहरू बंदर प्राधिकारण व राष्ट्रीय महामार्ग प्राधिकरण यांनी संयुक्तपणे ५०० कोटींची गुंतवणूक असलेला मल्टीमॉडेल हब हा प्रकल्प राबवण्याची तयारी दर्शवली व प्रकल्पाचा सविस्तर प्रकल्प अहवाल तयार केला. केंद्रीय आरोग्य राज्यमंत्री डॉ. भारती पवार यांनी त्या अहवालास मान्यता मिळवण्यासाठी प्रयत्न केले. त्यानंतर जवाहरलाल नेहरू बंदर प्राधिकरणने १२ जुलैस नाशिकच्या जिल्हाधिकाऱ्यांना जमीन खरेदीची प्रक्रिया राबवण्यासाठी पत्र पाठवले होते.
त्यानुसार जिल्हाधिकारी कार्यालयाने निफाड प्रांताधिकारी कार्यालयाच्या माध्यमातून जमीन हस्तांतरण प्रक्रिया सुरू केल्याने जवाहरलाल नेहरू पोर्टट्रस्टने जमिनीपोटीची रक्कम जमा केल्याने या प्रकल्पाबाबत एक पाऊस पुढे पडले आहे.
जिल्ह्याच्या विकासाला चालना
निफाड कारखान्याच्या जागेपासून रेल्वे आणि महामार्ग अगदी १० किलोमीटरच्या आत उपलब्ध आहेत. त्यामुळे हा प्रकल्प दोन वर्षांमध्ये कार्यान्वित होऊ शकतो. या प्रकल्पात कस्टम पॅकेजिंग, हॅण्डलिंग अशा सुविधा उपलब्ध असतील. ज्यामुळे जवाहरलाल नेहरू पोर्ट ट्रस्ट येथे होणारा कालापव्यय टळणार आहे. या केंद्रामुळे कांदा, द्राक्ष, डाळिंब, भाजीपाल्यासह औद्योगिक उत्पादनांची निर्यात सुलभ होईल. मल्टी मॉडेल हबमुळे जिल्ह्याच्या विशेषत: निफाड, दिंडोरी, नाशिक, सिन्नर, येवला या तालुक्यांच्या अर्थकारणाची दिशा बदलणार आहे.