नाशिक (Nashik): नाशिक महापालिकेच्या बांधकाम विभागाने मागील आठवड्यात शहरातील रस्त्यांवरील खड्डे व बुजवलेले खड्डे यांची माहिती संकलित करून शहरातील तीनही आमदारांच्या उपस्थितीत झालेल्या बैठकीत सादर केली. मात्र, महापालिकेच्या अधिकाऱ्यांनी दिलेल्या माहितीवर आमदार विश्वास ठेवण्यास तयार नसल्याचे लक्षात आल्यानंतर महापालिका प्रशासनाने पुन्हा एकदा शहरातील रस्त्यांवरील खड्ड्यांचे सर्वेक्षण करून त्यानंतर ते बुजवण्यात येणार आहे.
आमदारांच्या बैठकीनंतर महापालिका आयुक्त मनीषा खत्री यांनी सर्व कार्यकारी अभियंता यांची बैठक घेऊन खड्डे बुजवण्याचे आदेश दिले आहेत. त्याप्रमाणे अधिकाऱ्यांनी पुन्हा एकदा सर्वेक्षण करून माहिती मागवली आहेत. त्यानुसार शहरातील सहाही विभागांतील खड्डे पडलेल्या मुख्य रस्त्यांसह कॉलनी रस्त्यांच्या सर्वेक्षणास सुरुवात केली आहे. त्याचा अहवाल सात दिवसात देण्याचे निर्देश देण्यात आले आहेत.
नाशिक शहरातील सर्व प्रमुख रस्त्यांवर मोठ्याप्रमाणावर खड्डे पडले असून, त्याबाबत नागरिकांच्या भावना तिव्र आहेत. सध्या भारतीय जनता पक्षाकडून इच्छुक उमेदवार घरोघरी जाऊन नागरिकांशी संवाद साधत आहेत. त्यावेळी नागरिकांकडून कॉलनी रस्ते, प्रमुख रस्ते यांच्या दुरवस्थेविषयी तक्रारी मांडल्या जात आहेत. तसेच विरोधी पक्षांकडून इच्छुक उमेदवारही गृहभेटींमध्ये खराब रस्त्यांचा मुद्दा मांडत आहेत.
यामुळे महापालिका निवडणुकीत रस्त्यांवरील खड्डे हा मुद्दा अडचणीचा ठरू शकतो, हे लक्षात आल्याने शहरातील तीनही आमदार कधी नव्हे ते शहरातील प्रश्नांबाबत एकत्र आले. त्यांनी महापालिका आयुक्तांना याबाबत जाब विचारतानाच शहरातील रस्त्यांवरील खड्डे बुजविले जात नसल्याची तक्रार केली होती.
महापालिकेच्या बांधकाम विभागाने याप्रकरणा केलेला अहवाल आमदारांना सादर केला. त्यात त्यांनी २८ हजार ८३० पॅच व खड्ड्यांपैकी २३ हजार ५७६ खड्डे बुजवल्याची माहिती देण्याचा प्रयत्न केला. शहरात आता केवळ ५ हजार २५४ खड्डे उरले असल्याचेही सांगितले. मात्र, हे तीनही आमदार ऐकण्याच्या मनस्थितीत नव्हते.
यावेळी त्यांनी कामांमध्ये सुधारणार न दिसल्यास विधानसभेत प्रश्न मांडू अशी तंबी दिली होती. यामुळे आमदारांच्या बैठकीनंतर आयुक्त मनीषा खत्री यांनी सर्व कार्यकारी अभियंता यांची बैठक घेऊन खड्डे बुजवण्याचे आदेश दिले आहेत.
शहरातील रस्त्यांची अवस्था बिकट झाली आहे. यामुळे काम न करणाऱ्या ठेकेदारांना नोटिसा पाठविण्याच्या सुचना आयुक्तांनी अधिकाऱ्यांना दिल्या. शहरातीव सर्वच विभागांमध्ये भुयारी गटारीची कामे, पाणीपुरवठ्याची कामे, भूमिगत एमएनजीएल पाइपलाइनच्या कामांमुळे अनेक रस्त्यांवर खोदकाम फायबर कंपन्यांचे केबल नेटवर्किंगची सुरू आहे. त्यामुळे रस्त्यांवर खड्डे पडले आहेत.
शहरात स्मार्ट सिटीमार्फतही सुरू असलेल्या रस्त्यांचे डांबरीकरण व अस्तरीकरणाचन कामे लवकरात लवकर पूर्ण करण्याचे आदेश आयुक्तांनी दिले आहेत. यामुळे बांधकाम विभागाचे उपअभियंता प्रत्यक्ष जाऊन रस्त्यांची पाहणी करणार आहेत. शहरातील सर्व रस्त्यांच्या तत्काळ दुरुस्तीचे आदेश देण्यात आले आहेत. तसेच रस्ते कामांची प्रत्यक्ष पाहणी करण्यात येणार आहे. निकृष्ट दर्जाचे काम करणाऱ्या ठेकेदारांवर दंडात्मक कारवाई करण्यात येणार आहे.
आवश्यकतेनुसार संबंधित ठेकेदारांना ब्लॅकलिस्ट टाकण्याबाबतही आयुक्तांच्या बैठकीत निर्णय झाला आहे. यामुळे महापालिका निवडणुकीच्या निमित्ताने का होईना, नाशिककरांची खड्ड्यांमधून प्रवासातून मुक्तता होईल, अशी आशा निर्माण झाली आहे.