लक्ष आहे आमचं! मुंबई-पुणे एक्स्प्रेसवेवर नियम मोडणारांना दणका

पुणे (Pune) : पुणे-मुंबई द्रुतगती मार्गावर (Pune - Mumbai Expressway) बेशिस्त वाहन चालकांना शिस्त लावण्यासाठी परिवहन विभागाच्या वतीने सहा पथक तैनात करण्यात आले आहे. त्याद्वारे विविध ठिकाणी कारवाई सुरू आहे. मात्र, रोजची वाहतूक लक्षात घेता कारवाईचे प्रमाण कमी आहे. द्रुतगती मार्गावर सर्वांत जास्त कारवाई लेन कटिंग करणाऱ्या वाहनांवर झाली आहे. त्यानंतर सीटबेल्ट न लावलेल्या वाहन चालकांवर कारवाई करण्यात आली आहे.

...अशी आहे मोहीम
- परिवहन विभागाच्यावतीने २२ डिसेंबरपासून पुणे-मुंबई द्रुतगती मार्गावर व जुन्या महामार्गावर कारवाई सुरू
- यासाठी पुणे, पिंपरी, ठाणे, पनवेल, मुंबई आदी आरटीओचे पथक २४ तास कार्यरत
- इंटरसेप्टर वाहनाच्या माध्यमातून ते विविध ठिकाणी कारवाई
- १ ते २५ डिसेंबरमध्ये सर्वाधिक कारवाई लेन कटिंग करणाऱ्या वाहनांवर
- लेन कटिंगच्या ८९६ वाहनांवर कारवाई
- विना सीट बेल्ट वाहन चालविणाऱ्या ८८८ वाहनांवर कारवाई
- महामार्ग पोलिसाकडून देखील कारवाई सुरूच आहे.

रोजची किमान ४० हजार वाहने
पुणे-मुंबई द्रुतगती मार्गावर रोज किमान ४० हजार वाहनांची वाहतूक होते. हा आकडा सुट्टीच्या दिवशी अथवा शनिवार व रविवारी अधिक असतो. आठवड्याच्या शेवटी वा सुट्टीच्या दिवशी हा आकडा ७० हजारच्या घरात जातो. वाहनाच्या संख्येच्या तुलनेने एक टक्के वाहनांवर देखील रोजची कारवाई झालेली नाही.

१ ते २५ डिसेंबर दरम्यान कारवाई
- ओव्हरस्पीड : ६६०
- लेन कटिंग : ८९६
- विना सीटबेल्ट : ८८८
- अवैध पार्किंग : ४२७
- एकूण ः २८७१

आरटीओच्या विविध पथकांकडून द्रुतगती मार्गावर कारवाई सुरू आहे. २४ तास आम्ही कारवाई करीत आहोत. लेन कटिंग करणाऱ्या वाहनांवर सर्वात जास्त कारवाई करण्यात आली.
- भारत कलासकर, उप प्रादेशिक परिवहन अधिकारी, मुंबई