मुंबई (Mumbai): राष्ट्रीय महामार्ग प्राधिकरणाच्यावतीने वाढवण बंदर ते महामार्ग 48 वरील 'तवा' या गावादरम्यानच्या चार-पदरी द्रुतगती महामार्गाच्या बांधकामाचे कंत्राट 'मे. जे. कुमार इन्फ्राप्रोजेक्ट्स लिमिटेड' आणि 'मे. शिंदे डेव्हलपर्स प्रा. लि.' या जॉइंट व्हेन्चरला देण्यात आले आहे. हा प्रकल्प 'अभियांत्रिकी, खरेदी आणि बांधकाम' (ईपीसी) पद्धतीनुसार बांधण्यात येणार आहे. या कामासाठी 2,360 कोटी रुपयांचा खर्च अपेक्षित आहे.
दिल्ली-मुंबई द्रुतगती महामार्ग (एनई4) आणि एनएच-48 यांना जोडणारा हा द्रुतगती महामार्ग, राज्यातील विविध भागांना बंदराशी अखंडतेने जोडणी उपलब्ध करून देईल.
या प्रकल्पामध्ये 32.1 किलोमीटर लांबीच्या 'प्रवेश-नियंत्रित' द्रुतगती महामार्गाच्या बांधकामाचा समावेश आहे. यासोबतच, 800 मीटर लांबीचा दुहेरी बोगदा, दोन मोठे पूल, दोन ‘इंटरचेंजेस’, 33 लहान पूल, सहा उड्डाणपूल, 84 मोऱ्या, एक रेल्वे ओव्हरब्रिज, सात वाहनीय भुयारी मार्ग, 24 एलव्हीयूपी, चार एसव्हीयूपी आणि दोन 'मार्गांवरील सुविधा केंद्रे'यांची उभारणी करणे, हा देखील या प्रकल्पाचा भाग आहे. या प्रवेश-नियंत्रित द्रुतगती महामार्गाची सध्याची चौपदरी रचना भविष्यात आठ पदरी करण्यायोग्य असणार आहे.
वाढवण बंदराचा विकास प्रमुख बंदराच्या स्वरूपाप्रमाणे केला जाणार आहे. या बंदराची प्रस्तावित कंटेनर हाताळणी क्षमता 23.2 दशलक्ष टीईयू इतकी असणार आहे. या बंदरामध्ये 20 मीटर इतकी नैसर्गिक पाण्याची खोली उपलब्ध असेल आणि या बंदराचे काम दोन टप्प्यांत कार्यान्वित केले जाईल. 15 दशलक्ष टीईयू इतकी कंटेनर हाताळणी क्षमता असलेला या प्रकल्पाचा पहिला टप्पा, 2030 पर्यंत कार्यान्वित होण्याची शक्यता आहे.
एकदा महामार्गाचे काम पूर्ण झाल्यानंतर, हा प्रवेश-नियंत्रित द्रुतगती महामार्ग प्रादेशिक जोडणीला चालना देईल. त्यामुळे मालवाहतुकीचा खर्च कमी होईल आणि या प्रदेशात बंदराशी जलद जोडणी उपलब्ध करून देत असतानाच, दीर्घकालीन आर्थिक विकासालाही हातभार लागेल.