चंद्रपूर (Chandrapur) : येथील शासकीय वैद्यकीय महाविद्यालय व रुग्णालयात रुग्णसंख्या वाढून आरोग्य सुविधांवर कमालीचा ताण असताना राज्य सरकारने 175 सुरक्षारक्षकांच्या भरतीचा निर्णय घेतला, यातून वैद्यकीय महाविद्यालय व रुग्णालयातील डॉक्टर, प्राध्यापक, परिचर्या संवर्ग, अधिकारी व कर्मचारी यांच्यावर रुग्णांच्या नातेवाईकांकडून होणाऱ्या हाणामारीच्या घटनांना आळा बसेल, असा दावा केला जात आहे.
चंद्रपुरातील शासकीय वैद्यकीय महाविद्यालयातून 2017 पासून पहिली तुकडी सुरू झाली. 100 बेडच्या या महाविद्यालयातील विद्यार्थ्यांसाठी टीबी रुग्णालय व महिला रुग्णालयाचे कॅम्पस उपलब्ध करून दिले. 650 खाटांच्या वैद्यकीय रुग्णालयासाठी जिल्हा रुग्णालयाची इमारत डीएमईआरकडे सुपूर्द केली. वैद्यकीय महाविद्यालय व रुग्णालयाची नवीन इमारत उभारण्यासाठी राज्य सरकारने बल्लारपूर बायपास रस्त्यावर 100 एकर जागा दिली.
या जागेवर वैद्यकीय महाविद्यालय, रुग्णालय, वसतिगृह व शासकीय निवासस्थान आदी बांधकामे सुरू आहेत. 1 लाख 32 हजार 103 चौरस मीटर 6 मजली रुग्णालयाचे बांधकाम, कधी निधीअभावी तर कधी बांधकाम कंपनीच्या दिरंगाईने नऊ वर्षांनंतरही पूर्ण झाले नाही. या 3 कंपनीला हे बांधकाम 2020 च्या अखेरीस पूर्ण करण्याची डेडलाईन होती. सध्याच्या जागेत आरोग्य सुविधांची कमरता असूनही काही डॉक्टर, परिचर्या संवर्ग, अधिकारी व कर्मचारी प्रामाणिकपणे आरोग्यसेवा देत आहेत.
सुरक्षारक्षक किती व कुठे असणार?
हाणामारीच्या घटनांना पायबंद आणि संस्थेतील यंत्रसामुग्री, फर्निचर व इतर वस्तूंच्या सुरक्षेच्या दृष्टीने राज्य सुरक्षा महामंडळ, मुंबई यांच्याकडून चंद्रपूर येथील शासकीय वैद्यकीय महाविद्यालय व रुग्णालयासाठी 175 सुरक्षारक्षक बाह्यस्रोताकडून घेण्याचा प्रस्ताव वैद्यकीय शिक्षण आयुक्तांनी सादर केला होता. या प्रस्तावाला सरकारने मंजुरी प्रदान केली.
वैद्यकीय महाविद्यालयात 35 व रुग्णालयात 140 सुरक्षारक्षक तैनात असतील. राज्य सुरक्षा महामंडळाकडून सुरक्षारक्षक उपलब्ध करून घेण्यासाठी एकूण वार्षिक 7 कोटी 10 लाख 97 हजार 360 रुपयांच्या प्रस्तावाला वैद्यकीय शिक्षण व औषधी द्रव्ये विभागाने मान्यता दिली आहे.
