मुंबई (Mumbai): वाढवण बंदर (तवा) ते हिंदूहृदयसम्राट बाळासाहेब ठाकरे महाराष्ट्र समृध्दी महामार्ग (भरवीर येथे) यांना जोडणाऱ्या फ्रेट कॉरिडॉरला राज्य मंत्रिमंडळाच्या बैठकीत आज मान्यता देण्यात आली.
प्रकल्प आखणी व भूसंपादन प्रक्रिया राबवण्यासही यावेळी मान्यता देण्यात आली आहे. सार्वजनिक बांधकाम विभागाच्यावतीने या कॉरिडॉरची अंमलबजावणी करण्यात येणार आहे. बैठकीच्या अध्यक्षस्थानी मुख्यमंत्री देवेंद्र फडणवीस होते.
हा महामार्ग वाढवण येथील ७६,२०० कोटी रुपये खर्चाच्या ग्रीनफिल्ड खोल समुद्र बंदराशी कनेक्टिव्हिटी वाढवण्यासाठी महत्त्वाचा ठरणार आहे. या प्रकल्पामुळे नाशिक आणि वाढवण दरम्यानचा प्रवास सुकर होईलच, शिवाय आर्थिक विकासालाही चालना मिळेल, अशी अपेक्षा व्यक्त केली जात आहे.
मंत्रिमंडळ बैठकीतील महत्त्वाचे निर्णय...
- महाराष्ट्र स्टार्टअप, उद्योजकता आणि नाविन्यता धोरण २०२५ जाहीर
- राज्य शासनाच्या छोट्या, चिंचोळ्या आकाराच्या, बांधकामास अयोग्य, उपयुक्त आकार नसलेल्या, सुलभ पोहोच मार्ग नसलेल्या किंवा लॅण्‍ड लॉक्ड स्वरुपातील भूखंडांच्या वितरण धोरणास मंजुरी.
- महाराष्ट्र राज्य मार्ग परिवहन महामंडळाच्या अतिरिक्त जमिनींचा व्यापारी तत्वावर वापर. सुधारित धोरणास मंजुरी.
- नागपूर विणकर सहकारी सूतगिरणीच्या १ हजार १२४ कामगारांना ५० कोटींचे सानुग्रह अनुदान मिळणार. सुतगिरणीच्या जमीन विक्रीतून निधीची तरतूद.
- जळगाव जिल्ह्यातील मौजे पाचोरा येथील भुखंडावरील क्रींडागणाचे आरक्षण वगळून, त्याचा रहिवास क्षेत्रात समावेश करण्यास मान्यता.
- कुष्ठरुग्णांसाठी कार्यरत स्वयंसेवी सस्थांच्या अनुदानात वाढ, अनुदान २ हजारांवरून 6 हजार करण्यास मान्यता.